കോണ്‍ക്രീറ്റ് കെട്ടിടങ്ങളിലെ മഴയ്ക്ക്
സൗന്ദര്യമില്ല 
അവൾ നാണം കുണുങ്ങിയല്ല 
ഉയരങ്ങളിൽ നിന്നും ഗർവ്വോടെ 
താഴേക്ക്‌ 
അല്ലെങ്കിൽ നിശ്ചയിക്കപ്പെട്ട 
ഓവു ചാലുകളിലൂടെ 
നിശബ്ദമായി...
പണ്ട്, ഓടു മേഞ്ഞ പൂമുഖങ്ങളിലിരുന്ന് 
നാം കണ്ടിരുന്ന 
നിരയായി വീഴുന്ന
കനമുള്ള മഴനൂലുകൾ
നമ്മുടെ മനസ്സുകളിലേക്കാണ്
പെയ്തിറങ്ങിയിരുന്നത്
അവിടെ തണുപ്പും ഗൃഹാതുരത്വവുമായി
പെയ്തു നിറഞ്ഞ്
ഒരു മഴക്കാലത്തിന്റെ
നനവും കുളിരുമുള്ള ഓർമ്മക്കാലം
നമുക്ക് സമ്മാനിച്ചത്,
നാം ഉമ്മറതിണ്ണയിൽ നിന്നും
കൈനീട്ടിയെത്തിച്ച്
കൈവെള്ളയിൽ വീണുതെറിച്ച്
മുഖത്തു ചിതറിവീണ
ആ മഴനൂലുകളായിരുന്നു.........