നീയും അവനും 
--------------------------
നിനക്കും അവനുമിടയിൽ 
പൊതുവായി ഒന്നുമില്ല 
നീ മനസ്സിലേക്ക് പൊഴിഞ്ഞു വീഴുന്നത് 
സ്നേഹതൂവലുകൾ പോലെയാണ് 
എന്നാൽ മനസ്സിന്റെ ചില 
ഇരുണ്ട കോണുകൾ പ്രകാശിപ്പിക്കുന്നത് 
അവനു മാത്രം കഴിയുന്നതും 
നീ ഒരു കാറ്റായി പൊതിയുന്നു 
ചുറ്റും സ്നേഹത്തിന്റെ സുഗന്ധം മാത്രം
അവൻ നിറയ്ക്കുന്നത് നൊമ്പരങ്ങൾ മാത്രം
പൊതിയുന്നത് കൊടുങ്കാറ്റായും
എന്നിട്ടും ഓർമ്മകളിൽ
നിന്നോടൊപ്പം അവനും
വിരഹങ്ങളിൽ അവനോടൊപ്പം നീയും
നിനക്കും അവനുമിടയിൽ
പൊതുവായി ഞാൻ, ഞാൻ മാത്രം